A entrada principal da Casa de Galicia, situada no número 8 de Casado do Alisal, permanecerá pechada a causa da execución das obras de mellora da accesibilidade ao edificio. Durante o tempo que duren estes traballos, o acceso ás instalacións realizarase a través do número 6 da rúa Moreto. 

Este acceso provisional permitirá coñecer a chamada porta dos azulexos, un vestíbulo alicatado con cerámicas de Enrique Guijo. Este artista cordobés é o autor dos característicos azulexos comerciais de Madrid.  Os que se conservan na Casa de Galicia foron ideados a mediados dos anos 20 do século pasado para o Palacio de Agustín González de Amezúa, o académico e historiador que mandou levantar o edificio en 1924. Este conxunto de azulexos foi rehabilitado en 1991 por Esther García Ocampo.